FABC 2026: "පාලම් තැනීම අපගේ දෛනික සේවාවේ ස්වභාවයයි" – පාකිස්තාන කතෝලික රදගුරු සම්මේලන සභාපති සැම්සන් ශුකර්ඩින් රදගුරුතුමා
FABC 2026: "පාලම් තැනීම අපගේ දෛනික සේවාවේ ස්වභාවයයි" – පාකිස්තාන කතෝලික රදගුරු සම්මේලන සභාපති සැම්සන් ශුකර්ඩින් රදගුරුතුමා
ජකාර්තා, ඉන්දුනීසියාව – “සංගමනශීලී පරිවර්තනයට කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර” යන තේමාව යටතේ ජූලි 20 සිට 26 දක්වා ඉන්දුනීසියාවේ ජකාර්තා නුවරදී පැවැත්වෙන ආසියානු රදගුරු සම්මේලනයේ (FABC) 12 වන මහා සමුළුවට පෙර, රේඩියෝ වෙරිටාස් ආසියා (RVA) සමඟ පැවති සම්මුඛ සාකච්ඡාවකදී පාකිස්තාන කතෝලික රදගුරු සම්මේලනයේ සභාපති සහ හයිද්රාබාද් රදගුරු සැම්සන් ශුකර්ඩින් රදගුරුතුමා සිය බලාපොරොත්තු සහ ආසියාවේ සභාව මුහුණ දෙන අභියෝග පිළිබඳ අදහස් පළ කළහ.
ආගමික නිදහස, මානව හිමිකම් සහ සමාජ සාධාරණත්වය වෙනුවෙන් ප්රමුඛ හඬක් වන ශුකර්ඩින් රදගුරුතුමා පවසන්නේ, FABC මහා සමුළුව සුළුතර සභාවන්ට ආසියාවේ අනෙකුත් දේශීය සභාවන් සමඟ සම්බන්ධ වී එකිනෙකාට සවන් දීමට සහ පොදු ධර්මදූත මෙහෙවර යළි අලුත් කර ගැනීමට ලැබෙන ඉතා වැදගත් අවස්ථාවක් බවයි.
ආසියාවේ අභියෝගවලට පොදු ප්රතිචාරයක්
මෙවර මහා සමුළුව ආගමික නොඉවසීම, සමාජයේ අන්තයට තල්ලු වූ සුළුතර ප්රජාවන්ගේ ආරක්ෂාව, තරුණයන් සවිබල ගැන්වීම, ආර්ථික අසමානතා සහ දේශගුණික විපර්යාස වැනි ආසියාව මුහුණ දෙන ප්රධාන ගැටලු පිළිබඳ අවධානය යොමු කරනු ඇතැයි තමන් අපේක්ෂා කරන බව රදගුරුතුමා සඳහන් කළහ.
එමෙන්ම, XIV ලියෝ ශුද්ධෝත්තම පියතුමාගේ Magnifica Humanitas සමාජික අන්තර්ග්රන්ථයේ අවධාරණය කර ඇති පරිදි, කෘත්රිම බුද්ධිය (AI) වැනි නව තාක්ෂණික වර්ධනයන් සදාචාරාත්මක මඟපෙන්වීමකින් තොරව භාවිත කළහොත්, සමාජයේ වඩාත් අවදානමට ලක්වූ ජනතාවගේ මානව ගෞරවයට සහ ජීවනෝපායට බරපතළ බලපෑම් ඇති කළ හැකි බව ද උන්වහන්සේ පෙන්වා දුන්හ.
ඒ අනුව, සම්ප්රදායික සමාජ අසාධාරණකම් මෙන්ම නව තාක්ෂණික වෙනස්කම් හමුවේද මානව ගෞරවය ආරක්ෂා කරන්නේ කෙසේද යන්න පිළිබඳව සභාව ප්රායෝගික පිළිතුරු සෙවිය යුතු බව උන්වහන්සේ අවධාරණය කළහ.
පාකිස්තානයේ සභාවෙන් ආසියාවට පණිවිඩයක්
පාකිස්තානයේ කතෝලික සභාවට ආසියාවේ සභාවට ලබාදිය හැකි විශේෂ දායකත්වය පිළිබඳව අදහස් දක්වමින් ශුකර්ඩින් රදගුරුතුමා කියා සිටියේ, සුළුතර සභාවක් වුවද, අධ්යාපනය, සෞඛ්ය සේවාව සහ ප්රගතිශීලී මුස්ලිම් ආගමික නායකයන් සමඟ ඇති සමීප සහයෝගීතාව තුළින් සාමය ගොඩනැඟිය හැකි බවට පාකිස්තානයේ සභාව ජීවමාන සාක්ෂියක් සපයන බවයි.
"ජීවිතයේ සංවාදය" (Dialogue of Life) ලෙස හඳුන්වන මෙම ජීවන රටාව තුළින්, දුෂ්කර තත්ත්වයන් යටතේ පවා ආගමික සහජීවනය ගොඩනැඟිය හැකි ආදර්ශයක් පාකිස්තානය ආසියාවට ඉදිරිපත් කරන බවද උන්වහන්සේ සඳහන් කළහ.
"පාලම් ගොඩනැඟීම අපගේ දෛනික සේවාවේ ස්වභාවයයි"
FABC මහා සමුළුවේ ප්රධාන තේමා වන සංගමනශීලී පරිවර්තනය සහ පාලම් ගොඩනැඟීම පිළිබඳ අදහස් දක්වමින් රදගුරුතුමා පැවසුවේ, එම අදහස් පාකිස්තානයේ සභාවට න්යායාත්මක සංකල්ප නොව, දෛනික එඬේර ජීවිතයේ අත්දැකීම් බවයි.
"සංගමනශීලී පරිවර්තනය යනු අපගේ පූජකවරුන්, කැපවූවන් සහ ගිහි ජනතාව එක්ව, විශේෂයෙන්ම සින්ද් වැනි ග්රාමීය ප්රදේශවල ආර්ථික හා සමාජීය දුෂ්කරතාවලට මුහුණ දෙන පවුල් සමඟ ගමන් කිරීමයි. පාලම් ගොඩනැඟීම අපගේ දෛනික සේවාවේ ස්වභාවයයි. අපගේ ආයතන, මානව හිමිකම් ජාල සහ මනුෂ්යත්වය තුළ අන් අය හමුවීමෙන් අපි සෑම දිනකම පාලම් ගොඩනඟන්නෙමු."
ප්රායෝගික එඬේර සැලැස්මක් පිළිබඳ අපේක්ෂාව
මෙවර FABC මහා සමුළුවෙන් ප්රකාශනවලට පමණක් සීමා නොවූ, ප්රායෝගිකව ක්රියාත්මක කළ හැකි ආසියාව සඳහා වූ ඒකාබද්ධ එඬේර සැලැස්මක් බිහිවනු ඇතැයි තමන් බලාපොරොත්තු වන බවද ශුකර්ඩින් රදගුරුතුමා සඳහන් කළහ.
එමෙන්ම, ආසියානු රදගුරු සම්මේලන අතර ශක්තිමත් සහයෝගීතා ජාල, තරුණ හා නායකත්ව සංවර්ධනය සඳහා කලාපීය වැඩසටහන් සහ මානව හිමිකම් හා ආගමික නිදහස වෙනුවෙන් එකමුතු හඬක් නඟන ශක්තිමත් ආසියානු කතෝලික සභාවක් බිහිවීම තමන්ගේ ප්රධාන අපේක්ෂාව බවද උන්වහන්සේ ප්රකාශ කළහ.
සටහන: මෙම ලිපිය පාකිස්තානයේ නිදහස් මාධ්යවේදියෙකු වන යූසෆ් බෙන්ජමින් විසින් සම්පාදනය කරන ලද සම්මුඛ සාකච්ඡාවක් ඇසුරින් සකස් කරන ලදී.
