වසර 20ක ගමනකින් පසු පූජක කැඳවීමට යළි පැමිණි හිටපු දෙව්සත්හල් ශිෂ්යයා
ඇමරිකා එක්සත් ජනපදයේ සුවපහසු ජීවිතයක් ගත කිරීමට පවා අවස්ථාව තිබියදී, වසර 10ක් ගුරුවරයකු ලෙස සේවය කළ හිටපු දෙව්සත්හල් ශිෂ්යයෙකු වසර 20ක දිගු ගමනකින් පසු යළි පූජකත්වයට පැමිණ තිබේ.
තම සැබෑ කැඳවීම ලෙස විශ්වාස කළ පූජකත්වය නොසලකා හැරීමට තමන්ට නොහැකි වූ බව පවසන ගරු ශෆාකාත් ජෝන් පියතුමා, 2026 අගෝස්තු 11 වැනිදා ලාහෝර්හි දිව්ය හෘදයේ ආසන දෙව්මැදුරේදී ලාහෝර් අගරදගුරු කාලිඩ් රෙහ්මාත් හිමිපාණන් අතින් පූජකවරයට පත්විය.
අගෝස්තු 14 වැනිදා ලාහෝර් කැන්ට් ප්රදේශයේ පිහිටි සිය උපන් මීසම වන ශාන්ත ජෝසප් දේවස්ථානයේදී සිය ප්රථම දිව්ය පූජාව පැවැත්වීමත් සමඟ වසර දෙකකට ආසන්න කාලයක් පමණක් නොව, දශක දෙකක් පුරා පැවති ඔහුගේ කැඳවීම පිළිබඳ විමසුම, බලා සිටීම සහ සූදානම සම්පූර්ණත්වයට පත්විය.
1986 දෙසැම්බර් 8 වැනිදා ලාහෝර් නගරය ආසන්නයේ පිහිටි හන්ඩූ ගුජ්ජරාන් ගම්මානයේ උපත ලැබූ ගරු ශෆාකාත් ජෝන් පියතුමා දැඩි ආගමික විශ්වාසයකින් යුතු පවුලක හැදී වැඩුණේය.
ඔහුගේ මව්පියන් වූ ජෝන් මසීහ් සහ නර්ගස්, භාග්යවත් කන්යා මරිය තුමිය කෙරෙහි දැඩි භක්තියකින් යුතුව ජීවත් වූ අතර, සභාවේ සේවයටද කැපවී සිටියහ. ඔහුගේ පියා වසර 50කට ආසන්න කාලයක් ප්රදේශයේ දේවස්ථානයක ස්වේච්ඡා ගිහි සේවකයකු ලෙස සේවය කර තිබිණි.
සහෝදර සහෝදරියන් පස්දෙනෙකුගෙන් බාලයා වූ ශෆාකාත් 2006 වසරේදී ලාහෝර්හි ශාන්ත මරියා සුළු දෙව්සත්හලට ඇතුළත් විය. අනතුරුව 2009 වසරේදී ශාන්ත ෆ්රැන්සිස් සේවියර් දෙව්සත්හලේදී දර්ශනවාදය හැදෑරූ අතර, 2012 වසරේදී කරච්චියේ ක්රිස්තු රාජ දෙව්සත්හලේදී දේවධර්මය හැදෑරීය.
කෙසේ වෙතත්, පූජක පුහුණුව අතරතුර මුහුණ දුන් ඇතැම් දුෂ්කරතා හේතුවෙන් 2014 වසරේදී ඔහු දෙව්සත්හලෙන් ඉවත් විය.
ඉන් අනතුරුව වසර 10ක් පුරා ගිහියකු ලෙස ජීවත් වූ ඔහු, විවිධ අධ්යාපන ආයතනවල සංගීත ගුරුවරයකු ලෙස සේවය කළේය. ඒ අතර ලාහෝර්හි ශාන්ත ඇන්තනි උසස් පාසලද විය. එම කාලය තුළද ඔහු දේවස්ථාන ගායනා කණ්ඩායම් සමඟ එක්වෙමින් සභා සේවයට අඛණ්ඩව සම්බන්ධ වී සිටියේය.
ශාන්ත ඇන්තනි උසස් පාසලේ ගුරුවරයකු ලෙස සේවය කරමින් සිටියදී, ලාහෝර් අගරදගුරු සෙබස්තියන් ෆ්රැන්සිස් ෂෝ හිමිපාණන් ඔහුට යළි පූජක පුහුණුවට පැමිණෙන ලෙස ආරාධනා කළේය.
එම ආරාධනය ඔහුගේ ජීවිතයේ තීරණාත්මක අවස්ථාවක් බවට පත්විය.
එක් පසෙකින් ස්ථිර වැටුපක් සහිත රැකියාවක ආරක්ෂාව, පවුලේ වගකීම් සහ ඇමරිකා එක්සත් ජනපදයට යාමට හැකියාව තිබූ විවාහ යෝජනාවක් විය. අනෙක් පසින් තිබුණේ තම පූජක කැඳවීම අනුගමනය කරමින් යළි දෙව්සත්හලට පැමිණීමේ තීරණයයි.
දින තුනක් පුරා යාච්ඤා කරමින් සහ ගැඹුරින් සිතා බැලීමෙන් පසු ඔහු එම විවාහ යෝජනාව ප්රතික්ෂේප කළේය. අනතුරුව ගුරු රැකියාවෙන්ද ඉල්ලා අස්වී, 2024 වසරේදී යළි පූජක පුහුණුවට එක් විය.
“පූජකත්වය තමයි මගේ සැබෑ කැඳවීම. දෙවිඳුන් ජෝනා තුමාට මඟ පෙන්වූවා සේම, දෙවිඳුන් මටත් නැවත පැමිණීමට මඟ පෙන්වූවා.”
දෙව්සත්හලෙන් ඉවත්ව ගිහියකු ලෙස ගත කළ වසර 10 තමන්ගේ ජීවිතයේ අපතේ ගිය කාලයක් නොවන බවද ගරු ශෆාකාත් ජෝන් පියතුමා පවසයි.
සාමාන්ය ජනතාව දිනපතා මුහුණ දෙන ජීවන අරගල සහ දුෂ්කරතා වඩාත් හොඳින් අවබෝධ කර ගැනීමට එම කාලය තමන්ට උපකාර වූ බවත්, දුප්පතුන් සහ සමාජයේ අසරණ හා අවාසිසහගත ජනතාව වෙනුවෙන් සේවය කිරීමට තම කැමැත්ත තවදුරටත් ගැඹුරු වූ බවත් ඔහු පවසයි.
කෙසේ වෙතත්, පූජකවරයට පත්වූ දිනය ඔහුට සතුටත් සමඟ වේදනාවක්ද ගෙන ආවේය. ඒ, එම සුවිශේෂී අවස්ථාව දැක ගැනීමට ඔහුගේ මව්පියන් දෙදෙනාම ජීවත්ව නොසිටීම හේතුවෙනි.
ඔහුගේ මව නර්ගස් මියගොස් වසර පහක් ගතවී තිබූ අතර, ඔහු පූජකවරයට පත්වීමට වසර තුනකට පෙර ඔහුගේ පියාද අභාවප්රාප්ත වී තිබිණි.
“මම මගේ මව්පියන්ගේ යාච්ඤාමය ජීවිතයේ ප්රතිඵලයක්. මගේ පූජකත්වය මගේ මව්පියන් වෙනුවෙන් කැප කරනවා. මා ජේසුස් වහන්සේ සහ මරිය මෑණියන් වෙත සමීප කළ ඔවුන්ට මම ස්තූතිවන්ත වෙනවා.”
ලාහෝර් අගරදගුරු පදවියේ අනුනායක මෙන්ම ගරු ශෆාකාත් ජෝන් පියතුමාගේ සමීප මිතුරකුද වන ගරු අසීෆ් සර්දාර් පියතුමා, ඔහුගේ පූජකවරය ලැබීම විස්තර කළේ දිගු හා වේදනාකාරී ගමනක සම්පූර්ණත්වයක් ලෙසය.
“වසර 20ක වේදනාකාරී බලා සිටීමකින් පසු ශෆාකාත් අවසානයේ පූජාසනය සිප ගන්නා ආකාරය දැකීම මගේ දෑස්වලට කඳුළු ගෙන එනවා.”
දෙව්සත්හලෙන් ඉවත්ව ගත කළ දශකය “දෛනික ජීවිතය, පවුලේ වගකීම් සහ කිසිවෙකු නොදුටු හද කම්පා කරවන වේදනාවන්ගෙන්” පිරුණු කාලයක් වූ බවද ගරු අසීෆ් සර්දාර් පියතුමා පැවසීය.
වසර 20ක් පුරා විවිධ අභියෝග, බලා සිටීම් සහ තීරණ මැද තම පූජක කැඳවීම අත් නොහැර, අවසානයේ එම කැඳවීම වෙත යළි පැමිණි ගරු ශෆාකාත් ජෝන් පියතුමා මේ වන විට ලාහෝර් අගරදගුරු පදවියේ ක්රියාකාරී එඬේර සේවයට එක්ව සිටී.
පූජකවරයට පත්වීමෙන් අනතුරුව ඔහුට කරිටාස් ලාහෝර් ආයතනයේ දෛනික කටයුතු අධීක්ෂණය කිරීමේ වගකීමද පවරා තිබේ.
කර්තෘ පිළිබඳව
යූසෆ් බෙන්ජමින් පාකිස්තානයේ සිටින නිදහස් මාධ්යවේදියෙකි. ඔහු කතෝලික සඟරා සහ විවිධ මාධ්ය වේදිකා සඳහා ලිපි සපයයි.
#Priesthood #Vocation #CatholicChurch #CatholicFaith #PriestlyVocation #FaithJourney #CatholicNews #Pakistan #Lahore #ChurchVocations #RVA #RVASinhala #RadioVeritasAsia
