FABC 2026: කතෝලික ප්රජාව සමඟ දශක හතරක විශ්වාසයේ බැඳීමක් ගොඩනැඟූ බංග්ලාදේශ මුස්ලිම් වෙළෙන්දා
FABC 2026: කතෝලික ප්රජාව සමඟ දශක හතරක විශ්වාසයේ බැඳීමක් ගොඩනැඟූ බංග්ලාදේශ මුස්ලිම් වෙළෙන්දා
ඩකා, බංග්ලාදේශය – “සංගමනශීලී පරිවර්තනයට කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර” යන තේමාව යටතේ ජූලි 20 සිට 26 දක්වා ඉන්දුනීසියාවේ ජකාර්තා නුවරදී පැවැත්වෙන ආසියානු රදගුරු සම්මේලනයේ (FABC) 12 වන මහා සමුළුවට පෙර, විවිධ ආගමික ප්රජාවන් අතර දෛනික ජීවිතයේ ගොඩනැගෙන විශ්වාසය සහ සහයෝගීතාව පිළිබඳ ආදර්ශ කතාවක් බංග්ලාදේශයෙන් වාර්තා වෙයි.
ඩකා නුවර ටෙජ්ගාඔන් කතෝලික දේවස්ථානය අසල පිහිටි රෂීඩ් ග්ලාස් හවුස් වෙළඳසලේ හිමිකරු වන 73 හැවිරිදි මොහොමඩ් අබ්දුර් රෂීඩ්, වසර 40කට ආසන්න කාලයක් තිස්සේ කතෝලිකයන් සඳහා ජේසුස් වහන්සේගේ, භාග්යවන්ත කන්ය මරියතුමියගේ, ශුද්ධ වූ පවුලේ, ශුද්ධ ජුසේ මුනිතුමාගේ, පාදුවාවේ ශුද්ධ අන්තෝනි මුනිතුමාගේ, කල්කටාවේ ශුද්ධ තෙරේසා මව්තුමියගේ සහ XIV ලියෝ ශුද්ධෝත්තම පියතුමාගේ රාමු කළ ඡායාරූප අලෙවි කරමින් සිටී.
1988 වසරේ සිට මෙම සේවාව ආරම්භ කළ රෂීඩ් මහතාගේ වෙළඳසල පිහිටා ඇත්තේ ටෙජ්ගාඔන් කතෝලික පල්ලිය සහ හෝලි ක්රොස් පාසල අසලය. බංග්ලාදේශයේ විශාලතම කතෝලික ප්රජාවන්ගෙන් එකක් වන මෙම පල්ලියට කතෝලික විශ්වාසීන් 10,000කට අධික පිරිසක් අයත් වෙති.
ව්යාපාරයකින් ඇරඹුණු මිත්රත්වයක්
මුස්ලිම් ජාතිකයෙකු වන රෂීඩ් මහතා පවසන්නේ, කතෝලික ප්රජාව සමඟ ඇති සබඳතාව මුලින්ම ආරම්භ වූයේ ව්යාපාරික අවස්ථාවක් ලෙස වුවද, කාලයත් සමඟ එය අන්යෝන්ය විශ්වාසය සහ ගෞරවය මත පදනම් වූ බැඳීමක් බවට පත්වූ බවයි.
"මම විද්යාල ශිෂ්යයෙකු ලෙස ඡායාරූප රාමු කරන වෙළඳසලක වැඩ කළා. පසුව ෆාම්ගේට් ප්රදේශයේ මගේම වෙළඳසලක් ආරම්භ කළා. දවසක් පල්ලිය අසලින් යද්දී කෙනෙක් ජේසුස් වහන්සේගේ පින්තූර විකුණනවා දැක්කා. එදා ඉඳලා මමත් ක්රිස්තියානි ආගමික රූප අලෙවි කරන්න පටන් ගත්තා," යැයි ඔහු සිහිපත් කළේය.
කාලයත් සමඟ ඔහුගේ ව්යාපාරය වර්ධනය වී ඇති අතර, අද වන විට ඔහුගේ පුත්රයාද එහි කටයුතු සඳහා එක්ව සිටී. ඡායාරූප අලෙවියට අමතරව, සිසුන් සහ ප්රදේශවාසීන් සඳහා ඡායාපිටපත් සේවාවන්ද එම වෙළඳසල මඟින් සපයයි.
රෂීඩ් මහතාගේ ඇස්තමේන්තුවට අනුව, ඔහුගේ ගනුදෙනුකරුවන්ගෙන් සියයට 80ක් පමණ කතෝලිකයන්ය.
"පූජකවරුන්, කන්යා සොහොයුරියන්, රදගුරුවරුන් පවා මගේ වෙළඳසලට එනවා"
"මගේ වෙළඳසලට පූජකවරුන්, කන්යා සොහොයුරියන්, ආගමික සහෝදරවරුන් වගේම සමහර වෙලාවට රදගුරුවරුනුත් එනවා. ඔවුන් මට හරිම කරුණාවෙන් කතා කරනවා. ඔවුන් හමුවෙන්න මම ගොඩක් කැමතියි," යැයි රෂීඩ් මහතා පැවසීය.
ක්රිස්තියානි ආගමික භාණ්ඩ අලෙවි කිරීම සම්බන්ධයෙන් තම මුස්ලිම් ප්රජාවෙන් කිසිදු විවේචනයකට මුහුණ දීමට සිදු නොවූ බවද ඔහු සඳහන් කළේය.
ඔහුගේ වෙළඳසල තුළ ක්රිස්තියානි ආගමික රූප සමඟම ඉස්ලාමීය කැලිග්රැෆි, මක්කා සහ මදීනාහි ඡායාරූප මෙන්ම අල් කුර්ආනයේ පාඨද එකට ප්රදර්ශනය කර තිබීම විශේෂත්වයකි.
"මෙය අපට වැදගත් සේවාවක්"
දිගුකාලීන ගනුදෙනුකරුවෙකු වන ව්යාපාරික සුබීර් ගෝමස් මහතා පවසන්නේ, තම පවුල සඳහා අවසන් රාත්රී භෝජනය සහ කන්ය මරියතුමියගේ රාමු කළ ඡායාරූප රෂීඩ් මහතාගේ වෙළඳසලෙන් මිලදී ගත් බවයි.
"නිවසේ ආගමික රූප තිබුණාම ඒ ඉදිරියේ යාච්ඤා කරන්න පුළුවන්. අසීරු අවස්ථාවලදී ඒ යාච්ඤාවෙන් හිතට සැනසීමක් ලැබෙනවා," යැයි ඔහු පැවසීය.
මුස්ලිම් ජාතිකයෙකු වුවද කතෝලික ප්රජාවට මෙවැනි වැදගත් සේවාවක් සැපයීම පිළිබඳව තමන් කෘතඥ වන බවද ගෝමස් මහතා සඳහන් කළේය.
විශ්වාසයෙන් ගොඩනැඟෙන පාලම්
මිලියන 170කට ආසන්න ජනගහනයක් සිටින බංග්ලාදේශයේ කතෝලිකයන්ගේ සංඛ්යාව 450,000ක් පමණ වේ.
එවැනි සුළුතර කතෝලික ප්රජාවක් සමඟ දශක හතරකට ආසන්න කාලයක් තිස්සේ ගොඩනැඟුණු රෂීඩ් මහතාගේ සම්බන්ධතාව, ආගමික සංවාදය සැමවිටම විශාල සමුළු හෝ නිල සාකච්ඡා තුළින් පමණක් නොව, අසල්වැසියන් අතර, සේවාව තුළ සහ දෛනික ජීවිතයේ ගොඩනැඟෙන විශ්වාසය තුළින්ද වර්ධනය වන බවට ප්රබල සාක්ෂියකි.
ටෙජ්ගාඔන් කතෝලික ප්රජාව සඳහා රෂීඩ් මහතාගේ වෙළඳසල අද වන විට විවිධ ආගමික සම්ප්රදායන්ට අයත් මිනිසුන් විශ්වාසය, ගෞරවය සහ සහජීවනය තුළ එකට බැඳ තබන "පාලමක්" බවට පත්ව ඇත.
සටහන: මෙම ලිපිය බංග්ලාදේශයේ නිදහස් මාධ්යවේදියෙකු වන සුමන් කොරායා විසින් සම්පාදනය කරන ලද ලිපියක් ඇසුරින් සකස් කරන ලදී.
#FABC2026 #FABC #Bangladesh #BridgeBuilders #InterreligiousDialogue #Harmony #SynodalConversion #ChurchInAsia #RVASinhala #RadioVeritasAsia #CatholicNews #FaithInAction
