සංවාදය හා සහෝදරත්වය තුළින් ඉන්දුනීසියානු සභාව FABC සමුළුවට මඟ පෙන්වයි.
ඉන්දුනීසියාව, ජූලි 8 (RVA Sinhala) – 2026 ජූලි 20 සිට 26 දක්වා ජකාර්තා නුවර පැවැත්වෙන ආසියානු රදගුරු සම්මේලන සම්මේලනයේ (FABC) 12 වැනි මහා සමුළුව සඳහා ආසියාව පුරා සිටින රදගුරු හිමිවරුන් සූදානම් වන අතර, ඉන්දුනීසියානු කතෝලික සභාව සංවාදය, විවිධත්වය සහ සේවය මත ගොඩනැගුණු සිය විශේෂ සභානුභවය ආසියාව සමඟ බෙදා ගැනීමට සූදානමින් සිටී.
"ඔබ තවත් මහත් දේ දකින්නෙහිය" (යොහන් 1:50): සහෝදරත්වයේ පරිවර්තනය හා ආසියාවේ පාලම් සහ පාලම්-ගොඩනඟන්නන් වීමේ මෙහෙවර යන තේමාව යටතේ පැවැත්වෙන මෙම මහා සමුළුවේදී, ආසියාවේ රදගුරු හිමිවරුන් එකට යාච්ඤා කරමින්, විමර්ශනය කරමින් සහ සභාවේ ධර්මදූත මෙහෙවර නවෝදයකින් ඉදිරියට ගෙන යාම පිළිබඳව අවධානය යොමු කරනු ඇත.
ඉන්දුනීසියානු කතෝලිකයන්ට මෙම දැක්ම අලුත් දෙයක් නොවේ. ලොව විශාලතම ආගමික හා සංස්කෘතික විවිධත්වයක් ඇති රටක සුළුතරයක් ලෙස ජීවත් වන ඔවුන්, දශක ගණනාවක් පුරා වෙනස්කම් මධ්යයේ සංවාදය, සහෝදරත්වය සහ සහයෝගීතාව වර්ධනය කරමින් සුභාරංචියට සාක්ෂි දරා තිබේ. එම අත්දැකීම ආසියානු සභාවට ඉන්දුනීසියාව ලබා දෙන සුවිශේෂී දායකත්වයක් බවට පත්ව ඇත.
විවිධත්වය තුළ ජීවත් වන සභාවක්
දූපත් දහස් ගණනකින්, ජනවර්ග සිය ගණනකින්, භාෂා සහ විවිධ ආගමික සම්ප්රදායන්ගෙන් සමන්විත ඉන්දුනීසියාවේ කතෝලිකයන් රටේ ජනගහනයෙන් සියයට තුනක් පමණ වේ. සුළුතර ප්රජාවක් ලෙස ඔවුන් විවිධ ආගම් හා සංස්කෘතීන්ට ගරු කරමින්, විවෘතභාවය සහ අඛණ්ඩ සංවාදය තුළින් ක්රිස්තුස් වහන්සේගේ සුභාරංචියට සාක්ෂි දරයි.
1970 වසරේ ආරම්භ වූ FABC සම්මේලනය ආසියානු සංස්කෘතීන්, ආගම්, ජනතාව, විශේෂයෙන්ම දුප්පතුන් සහ සමාජයේ අන්තයට තල්ලු වූවන් සමඟ සංවාදය තුළින් සැබෑ ආසියානු සභාවක් ගොඩනැගීමේ දැක්මක් ඉදිරිපත් කළේය. ඉන්දුනීසියානු සභාවේ ජීවිතය එම දැක්මට සමීපව ගැළපෙන බව දැකිය හැකිය.
2022 දී බැංකොක්හි පැවති FABC 50 වැනි මහ සම්මේලනයේ "ආසියාවේ ජනතාව සමඟ එක්ව ගමන් කිරීම" යන ආරාධනයද මෙවර මහා සමුළුවේ තේමාව තුළ තවදුරටත් වර්ධනය වී ඇති අතර, දුප්පතුන්ගේ, තරුණයන්ගේ, සංක්රමණිකයන්ගේ, ආදිවාසී ජනතාවගේ සහ පාරිසරික අර්බුදවලින් පීඩාවට පත් වූ මැවිල්ලේ හඬට සවන් දෙන සභාවක් ගොඩනැගීම කෙරෙහි අවධානය යොමු කරයි.
පාලම් ගොඩනඟන සභාවක්
FABC හි දේවගැති දැක්මට අනුව "පාලම් ගොඩනඟන්නෙකු" වීම ආගමික සංවාදයට පමණක් සීමා නොවේ.
සභාව තුළ සවන් දීම, සහභාගිත්වය, විනිවිදභාවය, වගවීම සහ දෙවියන්ගේ ජනතාවගේ සක්රීය දායකත්වය තුළින් එකිනෙකා සම්බන්ධ කරන පාලම් ගොඩනැගිය යුතුය. එමෙන්ම සභාව බාහිර ලෝකය තුළ සාමය, සංහිඳියාව සහ සංවාදය ගෙන යන මෙවලමක් විය යුතුය.
මුස්ලිම්, ප්රොතෙස්තන්ත්රික, හින්දු, බෞද්ධ, කොන්ෆියුසියානු සහ ආදිවාසී ප්රජාවන් සමඟ ජීවත් වන ඉන්දුනීසියානු කතෝලිකයන්, කතෝලික පාසල්, රෝහල්, ආපදා සහන සේවා, මානුෂීය ව්යාපෘති සහ සමාජ සේවා තුළින් ආගම හෝ ජාතිය නොබලා සියලු දෙනාට සේවය කිරීමේ සංස්කෘතියක් ගොඩනඟා ඇත.
එමෙන්ම දේශීය භාෂා, සංගීතය, කලාත්මක අංග සහ සංස්කෘතික සම්ප්රදායන් පූජා විධිවලට සාර්ථකව එක්කරමින්, විශ්ව සභාවේ විශ්වාසයට විශ්වාසවන්තව පවතින සංස්කෘතික අනුකූලතාවයේ (Inculturation) පොහොසත් සම්ප්රදායක්ද ඉන්දුනීසියාව සතුව ඇත.
රට පුරා පවතින කතෝලික පාසල්, රෝහල්, ළමා නිවාස, වැඩිහිටි නිවාස සහ පුණ්යායතන දහස් ගණනක් පෙන්වා දෙන්නේ, ධර්මදූත සේවය වචනවලින් පමණක් නොව, මනුෂ්ය ගරුත්වය උසස් කරන දයාබර සේවයෙන්ද ප්රකාශ වන බවයි.
නව අවස්ථා සහ අභියෝග
ඩිජිටල් පරිවර්තනය සහ ඉන්දුනීසියාවේ තරුණ ජනගහනය, නව ධර්මදූත අවස්ථා විවෘත කර තිබේ. තරුණ කතෝලිකයන් නවෝත්පාදනය, සන්නිවේදනය සහ ධර්මදූත සේවය තුළින් සහෝදරත්වය මත ගොඩනැගුණු සභාවක් නිර්මාණය කිරීමට කැඳවනු ලබති.
එමෙන්ම, ලෝකයේ විශාල ජෛව විවිධත්වයක් හිමි රටක් වන ඉන්දුනීසියාව, දේශගුණික විපර්යාසයන්ටද දැඩි ලෙස ගොදුරු වන බැවින්, මැවිල්ල රැකගැනීම සහ පාරිසරික පරිවර්තනය සභාවේ මෙහෙවරේ අත්යවශ්ය අංගයක් බවට පත්ව ඇත.
කෙසේ වෙතත්, ලෞකිකත්වය, පුද්ගලවාදය, කෘත්රිම බුද්ධිය, වැරදි තොරතුරු, සමාජ ධ්රැවීකරණය සහ වෙනස්වන සන්නිවේදන රටාවන් වැනි අභියෝගද සභාව හමුවේ පවතී. එමෙන්ම ගිහි ජනතාවගේ වැඩි සහභාගිත්වය, තරුණයන්ගේ බලගැන්වීම, කාන්තාවන්ට නායකත්වයේ සහ තීරණ ගැනීමේ ක්ෂේත්රවල වැඩි ඉඩක් ලබාදීම, විනිවිද පෙනෙන පාලනය සහ සහභාගීත්වය මත පදනම් වූ ව්යුහයන් තවදුරටත් වර්ධනය කිරීමද අවශ්ය බව සභාව පිළිගනී.
දුප්පත්කම, සංක්රමණය, මිනිස් ජාවාරම, ආර්ථික අසමානතාව සහ පාරිසරික අර්බුද වැනි ගැටලු විසඳීම සඳහා සභාව, රජයන්, සිවිල් සමාජය සහ විවිධ ආගමික ප්රජාවන් අතර ගැඹුරු සහයෝගීතාව අත්යවශ්ය බවද අවධාරණය කෙරේ.
එකට ගමන් කරන සභාවක්
FABC 12 වැනි මහා සමුළුවේ සත්කාරකත්වය දැරීම, ඉන්දුනීසියානු කතෝලික සභාවට තම අත්දැකීම් ආසියාවේ අනෙකුත් ප්රාදේශීය සභාවන් සමඟ බෙදා ගැනීමට ලැබුණු විශේෂ අවස්ථාවකි.
ඔවුන් ඉදිරිපත් කරන්නේ පාලන ආදර්ශයක් පමණක් නොව, විවිධත්වය තුළ සංවාදය, සේවය, සහෝදරත්වය සහ එකමුතුව මගින් වර්ධනය වූ ජීවමාන සභාවක සාක්ෂියකි.
"ඔබ තවත් මහත් දේ දකින්නෙහිය" (යොහන් 1:50) යන ක්රිස්තුස් වහන්සේගේ පොරොන්දුව මත පදනම්ව, ආසියාවේ සභාවන් සහෝදරත්වයේ පරිවර්තනයේ ගමන තවදුරටත් ඉදිරියට ගෙන යමින්, දෙවියන් හා මනුෂ්යයා අතරත්, ජනතාව අතරත් පාලම් ගොඩනඟන, සාමය, යුක්තිය සහ මැවිල්ල රැකගැනීම වෙනුවෙන් කැපවන සභාවක් බවට පත්වීමට කැඳවනු ලබයි.
ඉන්දුනීසියාවෙන් ආසියාවට ඉදිරිපත් වන මෙම පණිවිඩය සරලය: විශ්වාසය, බලාපොරොත්තුව සහ ප්රේමය තුළ එකට ගමන් කරන සභාවක්, වේගයෙන් වෙනස් වන ලෝකයක සාමයේ, සහෝදරත්වයේ සහ එකමුතුවේ විශ්වසනීය ලකුණක් විය හැකිය.
කතුවරිය පිළිබඳව
අමාදේයා ප්රනාස්තිති (Amadea Pranastiti) සමාජ සන්නිවේදන ක්ෂේත්රයේ ක්රියාකාරිනියකි. ඇය වර්තමානයේ ඉන්දුනීසියානු රදගුරු සම්මේලනයේ ලේඛන හා තොරතුරු දෙපාර්තමේන්තුව (Documentation and Information Department) වෙත නිදහස් දායක ලේඛිකාවක් (Freelance Contributor) ලෙස කටයුතු කරයි.
